وردة المكناسية ( المغرب)
بغيت نصرخ ويعلا صوتي
وصوتي مامطاوعني
بغيت نندب ونجرح خدودي
ماعندي ظفار يبردو غدايدي
حتى الدموع نشفو من عيوني
ؤمالقيت حد يواسيني
حروفي ياناس مكسورة جناح
شمسها غربات في الضحى
ؤقمرها تلف ؤزهر في الصباح
يا فاعل الامر هذا حتى تقرا العاقبة
الحمل تقال ؤخرج على القاعدة
السفينة النجاة هرستي ليها لمجداف
ؤركبها تعبوا ؤقدامك ضعاف
راه لي غلب يعف ولا تكن جحاف
تفكر خيرها هي كانت سباب خيرك
خرجوا منها صحاب الهمة مثالك
ؤليوم يا فاعل الامر تحطمها
تحرم الضعاف منها
قطعتي الاوراق ؤهرستي لقلام
حطمتي شلا أحلام
ؤفينكم ياصحاب لكلام والاوهام؟
#المجدوبة
ليست هناك تعليقات:
إرسال تعليق